老趙，是一個80年代的名字。當年已經很出名的越南食店，可惜環境污糟，行起上嚟，仲會有唧唧聲，即係話個地下有漬同好濕滑！當然知道，佢後尾又摘星又行過吓潮，但係我又唔經過，亦都唔會特登去食，所以真係有排冇見。
前日去果欄，之後想搵啲嘢食，諗住兜入八文樓嗰頭，放低架車，然後慢慢搵吓有乜嘢食。忽然見到老趙，望埋去窗明几淨，而腦海亦都立即彈出好好味兩個字！決定入去睇吓而家乜嘢環境。
可能疫情關係，座位疏落，記憶中嘅地下已經唔出現，總之望落去舒坦順心。望吓個餐牌，價錢亦都唔貴。
仍然好好味。河粉唔使講，春卷同粉包真係正。果兩杯冰亦都好可口，唔係其他越南店水了了可以比。當然最好味係佢打嘅魚露，真係特別惹味，點乜都好食。老店真係老店。同人一樣，越老越正。
#何嘉麗callmegaga #何嘉麗 #出街玩 #果欄
#為食路上 #老趙 #越南菜 #好好味 #米之蓮
#佐敦 #八文樓 #數唔數出邊八文
Search